Bản tin thứ hai, ngày 16/01/2017

ព័ត៍មានថ្ងៃ​ច័ន្ទ ទី​១៦ ខែមករា​ ឆ្នាំ ២០១៧

 

១.បច្ចេកវិជ្ជាខ្ពស់ជួយលើកកំពស់ចំណូលនៃផ្ទៃដីដូចគ្នា ៖

នៅក្នុងពិធីបូកសរុបការងារ របស់ក្រសួងកសិកម្មនិងអភិវឌ្ឍន៍ទីជនបទ លោក Nguyễn Xuân Cường ជារដ្ឋមន្ត្រីក្រសួងកសិកម្មនិងអភិវឌ្ឍន៍ទីជនបទ បានមានប្រសាសន៍ថា ៖ ទោះជាអត្រានៃវិស័យកសិកម្មរបស់ទីក្រុងហូជីមិញ មានតម្លៃតែជិត 1% នៃបរិមាណផលសរុប របស់ទីក្រុង ប៉ុន្តែថ្នាក់ដឹកនាំរបស់ទីក្រុង នៅតែព្យាយាមអភិវឌ្ឍន៍វិស័យកសិកម្មទីក្រុង និងអនុវត្តបច្ចេកវិជ្ជាខ្ពស់ ចូលក្នុងវិស័យនេះ ។ ទោះជាផ្ទៃដីកសិកម្មនៅទីក្រុងហូជីមិញ ត្រូវបានថមថយចំនួនចុះជាលំដាប់ ដើម្បីបំរើវិស័យឧស្សាហកម្ម និងបង្កើតទីប្រជុំជនក៏ដោយ ក៏ទីក្រុងបានដាក់ចេញនូវគោលដៅ ទទួលបានប្រាក់ចំណូលប្រមាណ 450 លានដុង ក្នុងផ្ទៃដីមួយហិកតាក្នុងមួយឆ្នាំ ។ គោលដៅយ៉ាងនេះ គឺផ្អែកទៅលើការផ្លាស់ប្តូរដាំដំណាំស្រូវ ឱ្យបង្វែរទៅដាំដុះដំណាំដែលមានតម្លៃសេដ្ឋកិច្ចខ្ពស់ជាង និងសមស្របនឹងតម្រូវការរបស់ទីក្រុង ។ ហើយរយៈពេលពីរឆ្នាំកន្លងទៅ ទីក្រុងបានបន្តអនុវត្តបច្ចេកវិជ្ជាខ្ពស់ និងបច្ចេកវិជ្ជាសរីរាង្គ ចូលក្នុងកិច្ចការកសិកម្មទីក្រុង អាស្រ័យហេតុនេះ ក្នុងឆ្នាំ 2016 តម្លៃជាមធ្យមរបស់ផ្ទៃដី 1ha គឺទទួលបាន 410 លានដុង រីឯនៅឆ្នាំ 2011 ទើបទទួលបានតែ 170 លានដុងក្នុងផ្ទៃដី 1ha តែប៉ុណ្ណោះ ។ សព្វថ្ងៃនេះ ទីក្រុងហូជីមិញ បានអនុវត្តគំរោងការជាច្រើន ដែលដំណើរការដោយបច្ចេកវិជ្ជាខ្ពស់ ហើយក៏ទទួលបានប្រាក់ចណូលជាង 1.000 លានដុង ក្នុងផ្ទៃដីមួយហិកតា ដោយបានដាំដុះដំណាំសមស្រប ឬចិញ្ចឹមសត្វមានចំណូលខ្ពស់ៗដូចជា ៖ ដាំបន្លែទទួលបានប្រាក់ចំណូលពី 800 លានដុង ដល់ 1.000 លានដុងក្នុងមួយហិកាត, ដាំផ្កាអូគីដេ ទទួលប្រាក់បានជិត 2.000 លានដុងក្នុងមួយហិកតា, ចិញ្ចឹមសត្វគោរឺតទឹកដោះ ក្នុងទ្រង់ទ្រាយ 20 ក្បាល ទទួលបានប្រាក់ជាង 800 លានដុងក្នុងមួយឆ្នាំ, ចិញ្ចឹមបង្កងឬត្រីលំអរ ទទួលបានប្រាក់ប្រមាណ 1.000 លានដុងក្នុងមួយឆ្នាំជាដើម ។

 

 

២.ថ្លៃនៃផ្កាអង្គាសិលឡើងថ្លៃតិចតួចទោះជាចំនួនផ្កាមិនសូវច្រើនដូចឆ្នាំមុនៗ ៖

ឆ្នាំនេះ ដោយសារអាកាសធាតុប្រែប្រួលមិនសូវអំណោយផល មានអ្នកដាំដុះផ្កាអង្គាសិកខ្លះ ត្រូវខាតបង់ទទេ ឬខាតបង់ជាងពាក់កណ្តាល មកពីផ្កាអង្គាសិល ត្រូវរីកមុនពេលកំណត់ ធ្វើឱ្យថ្លៃរបស់ផ្កាអង្គាសិល ត្រូវឡើងថ្លៃខ្លះៗ ។ លោក Nguyễn Ngọc Phương ជាម្ចាស់ចំការដាំដុះផ្កាអង្គាសិល Phương Bình នៅឯសង្កាត់ Hiệp Bình Chánh ខណ្ឌ Thủ Đức ទីក្រុងហូជីមិញ បាននិយាយថា ៖ ទោះជាអាកាសធាតុប្រែប្រួលអាក្រក់ ផ្កាអង្គាសិលពុំសូវមានច្រើន ប៉ុន្តែថ្លៃលក់ឬថ្លៃជួល គ្រាន់តែឡើងថ្លៃតិចតួចតែប៉ុណ្ណោះ ។ ឧទាហរណ៍ថា ផ្កាអង្គាសិល ឆ្នាំទៅលក់ 10 លានដុងក្នុងមួយួដើម រីឯឆ្នាំនេះ អាចប្រែប្រួលពី 11 លានដុង ដល់ 12 លានដុង ក្នុងមួយួដើម ។

 

៣.ទីក្រុងហូជីមិញ ជួយឧបត្ថម្ភកសិករបំពាក់ម៉ាស៊ីនដើម្បីចិញ្ចឹមសត្វគោរឺតទឹកដោះ ៖

ឆ្លងរយៈពេល 6 ឆ្នាំ ដំណើរការគំរោងការ “បំពាក់ម៉ាស៊ីនក្នុងវិស័យចិញ្ចឹមសត្វគោរឺតទឹកដោះ” ប្រយោជន៍ដើម្បីលើកកំពស់គុណភាព របស់ហ្វូងសត្វគោរឺតទឹកដោះនៅទីក្រុងហូជីមិញ គឺមានកសិករចំនួន 951 ក្រុមគ្រួសារ បានចុះឈ្មោះចូលរួមក្នុងកម្មវិធីនេះ ហើយពួកគាត់ ត្រូវបានជួយឧបត្ថម្ភថវិការវិនិយោគជាង 50% ។ កសិករដែលទទួលបានអាទិភាពបែបនេះ គឺរស់នៅស្រុក Củ Chi ស្រុក Hóc Môn ស្រុក Bình Chánh និងខណ្ឌលេខ 12 រួមមាន ៖ ម៉ាស៊ីនរឺតទឹកដោះគោចំនួន 660 គ្រឿង, ឧបករណ៍ដុះលាងម៉ាស៊ីនរឺតទឹកដោះចំនួន 84 គ្រឿង, ធុងរក្សាទឹកដោះគោចំនួន 1.573 ធុង, ម៉ាស៊ីនហាន់ស្មៅចំនួន 79 គ្រឿង, ម៉ាស៊ីនបាញ់ទឹកធ្វើឱ្យត្រជាក់ទ្រុងចំនួន 106 ម៉ាស៊ីន និងឧបករណ៍តាមដានកំដៅ ឧបករណ៍តាមដានកំរិតសំណើម ។ វិធីជួយឧបត្ថម្ភនេះ ក៏បានជួយឱ្យអ្នកចិញ្ចឹមសត្វគោរឺតទឹកដោះនៅទីក្រុងហូជីមិញ សកម្មក្នុងការបំពាក់ម៉ាស៊ីនចូលក្នុងកិច្ចការចិញ្ចឹមសត្វគោ លទ្ធផលទទួលបានគឺ បន្ថយចំណាយនានា បង្កើនទិន្នផល បង្កើនគុណភាពរបស់ទឹកដោះគោ មានប្រសិទ្ធិភាពល្អ និងជំនួសកម្លាំងមនុស្សដែលកំពុងជួបលំបាក ។

 

៤.ព្យាយាមការពារហ្វូងសត្វស្លាបនិងសត្វពាហនៈបន្ទាប់ពីទឹកជំនន់ ៖

តាំងពីខែវិច្ឆិកា ដល់ពាក់កណ្តាលខែធ្នូ ឆ្នាំ 2016 ប្រជាជននៅខេត្ត Bình Định ត្រូវរងនឹងទឹកជំនន់ជាបន្តបន្ទាប់ដល់ទៅ 5 ដង ធ្វើឱ្យវិស័យចិញ្ចឹមសត្វរបស់ខេត្ត ត្រូវប៉ះពាល់យ៉ាងធ្ងន់ធ្ងរ ។ មុនពេលទឹកជំនន់ជោរជន់ ខេត្ត Bình Định មានសត្វគោប្រមាណ 3 សែនក្បាល, សត្វជ្រូកប្រមាណ 8 សែន 5 ម៉ឺនក្បាល និងសត្វស្លាបជិត 7 លានក្បាល ។ ប៉ុន្តែទឹកជំនន់កន្លងទៅ បានសម្លាប់សត្វពាហនៈអស់ជាង 6.600 ក្បាល និងសត្វស្លាបជាង 195.500 ក្បាល ធ្វើឱ្យអ្នកចិញ្ចឹមសត្វមួយចំនួន សេដ្ឋកិច្ចគ្រួសារត្រូវជួបលំបាកយ៉ាងខ្លាំង ។ លោក Lê Ngọc Pháp ជាប្រធានសាខាចិញ្ចឹមសត្វប្រចាំខេត្ត Bình Định បាននិយាយថា ៖ ដើម្បីស្តារកិច្ចការចិញ្ចឹមសត្វសារឡើងវិញនោះ គឺគណៈកម្មាធិការប្រជាជនខេត្ត បានជួយឧបត្ថម្ភប្រជាជន ដែលមានសត្វចិញ្ចឹមងាប់ ក្នុងកំរិត សត្វស្លាប 18.000 ដុង ក្នុងមួយក្បាល, សត្វជ្រូកចំនួន 750.000 ដុងក្នុងមួយក្បាល និងសត្វគោក្របីចំនួន 4 លានដុងក្នុងមួយក្បាល ។ ហើយសាខាចិញ្ចឹមសត្វ ក៏ចាត់ចែងកម្លាំង អ្នកជំនាញ ចុះជាប់នឹងមូលដ្ឋាន ត្រូវសហការជាមួយរដ្ឋអំណាចប្រចាំមូលដ្ឋាន ដើម្បីដាស់តឿន ត្រួតពិនិត្យ និងឃ្លាំមើលកិច្ចការបង្ការជំងឺ កុំឱ្យជំងឺកើតឡើងជាដាច់ខាត ។

៥.ផ្លែទន្លាប់នៅខេត្តដាឡាតសំងួតតាមបច្ចកទេសមកពីប្រទេសជប៉ុនលក់បានថ្លៃ ៖

ក្នុងរយៈពេលជិតឈានចូលឆ្នាំថ្មី ផលិតផលផ្លែទន្លាប់សំងួតរបស់បងប្អូននៅខេត្ត Đà Lạt ត្រូវបានសំងួតតាមបច្ចេកទេសមកពីប្រទេសជប៉ុន ហើយកំពុងត្រូវបានអតិថិជនរកទិញ ប៉ុន្តែមិនងាយរកបានតាមដូចបំណងទេ ទោះជាថ្លៃរបស់ផលិតផលនេះ គឺមានថ្លៃខ្ពស់គួរសមដែរ ។ តាមលទ្ធផលនៃកិច្ចការស្រាវជ្រាវ គឺផ្លែទន្លាប់សំងួត ត្រូវបានគេលក់ក្នុងតម្លៃពី 42 ម៉ឺនដុង ដល់ 45 ម៉ឺនដុងក្នុងមួយគីឡូក្រាម ។ មូលហេតុធ្វើឱ្យផ្លែទន្លាប់ពិបាករកទិញនោះ គឺមកពីរដូវប្រមូលផលផ្លែនេះជិតអស់ហើយ ក្នុងពេលជាមួយគ្នានោះដែរ តម្រូវការទិញផ្លែនេះ បានកើនឡើងខ្ពស់ ដោយសារពេលនេះ គឺជិតចូលឆ្នាំថ្មី ។ លោកស្រី Đặng Thị Thu Vân ជាម្ចាស់សិប្បកម្ម Lê Vân នៅសង្កាត់លេខ 10 ទីក្រុង Đà Lạt បាននិយាយថា ៖ លើកនេះជាលើកចុងក្រោយនៃការសំងួតផ្លែទន្លាប់រដូវឆ្នាំនេះ ។ ផ្លែទន្លាប់ស្រស់ ត្រូវបានសំងួតតាមបច្ចេកទេសមកពីប្រទេសជប៉ុន ឡសំងួតត្រូវរក្សាសីតុណ្ហភាពថេរល្អ ហើយសំងួតបានប្រមាណ 3 សប្តាហ៍ គឺផ្លែទន្លាប់នឹងស្ងួតល្អ អាចយកទៅលក់ឱ្យអតិថិជនជិតឆ្ងាយ ។

 

 

 

ខេត្តដាឡាតនិងទីក្រុងហូជីមិញបើកមជ្ឈមទិញដូររុក្ខជាតិលំអរ

ដើម្បីសម្រួលដល់អ្នកដាំដុះរុក្ខជាតិលំអរនៅខេត្តឡិមដុង គណៈកម្មាធិការប្រជាជនទីក្រុង ដាឡាត នឹងសាងសង់មជ្ឈមណ្ឌលទិញដូររុក្ខជាតិលំអរនៅទីក្រុងដាឡាត ទន្ទឹមនឹងនោះផងដែរ អគ្គក្រុមហ៊ុនពាណិជ្ជកម្មសាយហ្គន់ ក៏សាងសង់មជ្ឈមណ្ឌលទិញដូររុក្ខជាតិលំអរនៅទីក្រុងហូជីមិញ ដើម្បីទទួលរុក្ខជាតិលំអរមកពីខេត្តឡឹមដុង ។

 

ទីក្រុង Đà Lạt និងឹសាងសង់មជ្ឈមណ្ឌលទិញដូររុក្ខជាតិលំអរនៅម្តុំចុងច្រកភ្នំ Mimosa ឃ្លាតឆ្ងាយពីកណ្តាលទីក្រុង Đà Lạt ប្រមាណ 10km ហើយទីនេះ ក៏ជាចំណុចប្រសព្វរវាងទីក្រុង Đà Lạt ជាមួយនឹងស្រុក Đức Trọng និងស្ថិតនៅជិតស្រុក Đơn Dương ដែលជាតំបន់ដាំដុះបន្លែនិងរុក្ខជាតិកំអរសំខាន់របស់ខេត្ត Lâm Đồng ។ តាមគំរោងផែនការ មជ្ឈមណ្ឌលនេះ នឹងត្រូវបានសាងសង់ក្នុងផ្ទៃដីប្រមាណ 16,6ha មានភារកិច្ចប្រមូលទិញរុក្ខជាតិលំអរដែលប្រជាជនដាំដុះក្នុងទីក្រុង Đà Lạt និងតំបន់ជិតៗ បន្ទាប់មក រុក្ខជាតិលំអរនឹងត្រូវបានវេចខ្ចប់និងដឹកទៅលក់នៅខេត្តផ្សេងៗក្នុងទូទាំងប្រទេស ។ ពិសេស មជ្ឈមណ្ឌលក៏រៀបចំរថយន្តគ្រប់គ្រាន់ ដើម្បីដឹករុក្ខជាតិលំអរទៅកាន់ទីក្រុងហូជីមិញ ។ មជ្ឈមណ្ឌលនេះ នឹងគណនាប័ណ្ណបញ្ជាតំនិញរបស់អតិថិជន និងព័ត៌មានអំពីរុក្ខជាតិលំអរ របស់អ្នកដាំដុះ ដើម្បីឈានទៅចុះកិច្ចកុងត្រាទិញលក់ទំនិញជាមួយួអតិថិជន ។

រីឯនៅទីក្រុងហូជីមិញវិញ មជ្ឈមណ្ឌលលក់ដូររុក្ខជាតិលំអរ នឹងត្រូវបានសាងសង់ឡើង នៅឯផ្សាលក់ដុំ Bình Điền ខណ្ឌលេខ 8 ដោយមានផ្ទៃដីប្រមាណ 14ha ។ នៅទីនេះ ផ្នែកចែកចាយនិងផ្នែកស្តុកទុក នឹងចែកចាយរុក្ខជាតិលំអរទៅផ្សារនានាក្នុងទីក្រុង ឬដឹកជញ្ជូនរុក្ខជាតិលំអរមកកាន់ហាង តាមការកុម្មង់របស់អតិថិជន ទន្ទឹមនឹងនេះ ប័ណ្ណបញ្ជាទំនិញថ្មី និងប្រាក់ទូទាត់ នឹងត្រូវបានផ្ញើទៅកាន់មជ្ឈមណ្ឌលនៅទីក្រុង Đà Lạt ដើម្បីទូទាត់ឱ្យអ្នកលក់ ។

 

 

 

រូបភាពគំរូនេះ ត្រូវបានកសាងដោយផ្អែកទៅលើរូបភាពគំរូ OTA មកពីប្រទេសជប៉ុន ។ លោក Susumi Kiryu ជាប្រធាននៃវិជ្ជាស្ថាន OTA បាននិយាយថា ៖ ប្រការសំខាន់របស់រូបភាពគំរូនេះ គឺប្រាក់លក់និងប្រាក់ទិញរុក្ខជាតិលំអរ ត្រូវច្បាស់លាស់ និងតម្លាភាព ទើបអ្នកដាំដុះរុក្ខជាតិលំអរទុកចិត្ត ពីព្រោះថា តាំងពីដើមមក អ្នកដាំដុះរុក្ខជាតិលំអរ មិនសូវបានដឹងច្បាស់អំពីថ្លៃរបស់ផលិតផលទេ ហើយពេលនេះ ប្រគល់ផលិតផលជូនមជ្ឈមណ្ឌល គឺថ្លៃនៃរុក្ខជាតិលំអរត្រូវច្បាស់លាស់ ហើយវិធីនេះក៏បន្ថយចំណាយដឹកជញ្ជូន និងចំណាយផ្សេងៗ ។ តាមផែនការកំណត់ មជ្ឈមណ្ឌលទាំងពីរនេះ នឹងចាប់ផ្តើមធ្វើសកម្មភាពពីឆ្នាំ 2018 ខាងមុខនេះតទៅ ។

យោងដំណឹងពីអគ្គក្រុមហ៊ុនពាណិជ្ជកម្ម Sài Gòn និងពីគណៈកម្មាធិការប្រជាជនទីក្រុង Đà Lạt គឺខេត្តអាចផ្តល់ផ្កាប្រមាណ 2.500 លានទង ក្នុងមួយឆ្នាំ ហើយផ្កាចំនួនប្រមាណ 90% នឹងត្រូវបានដឹកទៅលក់នៅទីក្រុងហូជីមិញ ៕

ប្រែសម្រួលដោយក្រុមចងក្រងភាសាខ្មែរនៃស្ថានីយ៌វិទ្យុះផ្សាយសម្លេងប្រជាជនទីក្រុងហូជីមិញ